Түркия Экспорттаушылар Ассамблеясы

Түркия Экспорттаушылар Ассамблеясы (TİM) – экспорттаушылар қауымдастықтарын біріктіретін бас ұйым. Оның тарихы Республикамыздың негізін қалаушы Ғази Мұстафа Кемал Ататүріктің нұсқауымен және 1937 жылғы 4 наурыздағы № 2/6107 қаулы негізінде құрылған «Тірі мал экспорттаушылар қауымдастығы» акционерлік қоғамына барып тіреледі. TİM-нің негізгі мақсаты – Түркияның сыртқы саудасына бағыт-бағдар беру, экспорттық саясатты айқындау, нарықтарды әртараптандыру және халықаралық аренада экспорттаушылардың бәсекеге қабілеттілігін арттыруға жәрдемдесу.

TİM – 61 экспорттаушылар қауымдастығы аясында тіркелген 27 салада қызмет ететін 150 000-нан астам экспорттаушының мүддесін қорғайтын, түрік экспорты саласындағы бірегей бас ұйым. Министрлер кеңесінің шешімімен 1993 жылы құрылған Ассамблеямыз өз қызметін 2009 жылы Ресми газетте жарияланған заң (3 шілде 2009 жыл, Ресми газет, № 27277, «Түркия Экспорттаушылар Ассамблеясы мен экспорттаушылар қауымдастықтарын құру және олардың міндеттері туралы» № 5910 заң) аясында жүзеге асырады.

Мекемеміздің басты миссиясы – тұрақты сыртқы сауда көлемін арттыру және сауда серіктес елдермен екіжақты коммерциялық, әлеуметтік және мәдени қарым-қатынастарды дамыту арқылы «сауда профициті бар Түркия» мақсатына қол жеткізу, сондай-ақ осы мақсатқа сай жүргізілетін іс-шаралар барысында жеке және мемлекеттік секторлар арасында дәнекер болу.

TİM мемлекеттік сектор мен экспорттаушыларымыз арасындағы диалогтың үздіксіздігін қамтамасыз ету арқылы өнеркәсіп, өндіріс және экспорт жолындағы барлық кедергілерді жоюға бағытталған жұмыстарды табанды түрде жүргізеді. Ел экономикасы мен экспортын дамытуға арналған стратегиялық жоспарларды әзірлейтін Ассамблеямыз оларды Үкіметпен бөліседі және экспорт стратегиясы, инновациялық стратегия мен инкубациялық орталықтар сияқты маңызды жобаларды үйлестіреді.

Құрамындағы экспорттаушылар қауымдастықтары арқылы өз аудиториясымен байланыста ықпалдылығын арттырып келе жатқан TİM сонымен қатар шетелдегі сыртқы сауда қауымдастықтарымен қарым-қатынастарды үйлестіреді.

Осы аяда біздің Ассамблея Халықаралық сауда орталығы (ITC) және Сауда-өнеркәсіп палаталары сияқты сыртқы сауданы дамыту жөніндегі басқа да ұйымдармен қарым-қатынасты нығайтуды көздейді.

TİM түрік экспорттаушыларының шетелдегі коммерциялық қызметін ілгерілету мақсатында көптеген іс-шаралар мен сауда делегацияларының жұмысын ұйымдастырады; сондай-ақ сауда серіктесі болып табылатын елдермен өзара түсіністік туралы келісімдерге қол қою арқылы қарым-қатынастарды дамытуда маңызды рөл атқарады. Бұған қоса, TİM түрік тауарларының шетелдегі беделіне қатысты зерттеулер жүргізеді және олардың танымалдығы, сенімділігі мен тұтынушылардың таңдауына қатысты арнайы талдау жұмыстарын ұйымдастырады.

TİM экспорттаушыларға өндіріс пен сыртқы саудада артықшылық беруге бағытталған көптеген ынталандыру шаралары мен қолдау көрсету ісіне өз үлесін қосады; ҒЗТКЖ (зерттеу және тәжірибелік-конструкторлық жұмыстар), дизайн және кәсіпкерлік саласындағы экожүйені қалыптастыру арқылы ол кәсіпкерлерімізге шетел нарығына шығуға және халықаралық аренада табысқа жетуге көмектеседі. Осы мақсатта Ассамблея экспорттаушы компаниялардың инновациялық әлеуетін арттыруға бағытталған «InoSuit бағдарламасы» және қосылған құны жоғары стартаптарды қолдауды көздейтін «TİM-TEB Global Houses» сияқты жобаларды жүзеге асырады.

«Сауда профицитіне қол жеткізген Түркия» құруды түпкілікті мақсат етіп белгілеген TİM ұлттық және халықаралық деңгейдегі табыстарының арқасында түрік экономикасының қарқынды дамуындағы маңызды субъектілердің бірі болып табылады және өз қызметін осы мақсатқа сай жалғастыруда.